پنجاب راکھی دیہاڑ
Punjab Defense Day
اوہ دن جدوں طاقت دے غرور اچ مست اک بادشاہ سکندر یونانی جہیڑا آپنے آپ نوں دیوتا سمجھدا سی۔ پنجابی قوم نال لڑن دی غلطی کر بیٹھا تے اوس دی طاقت دا غرور تے دیوتا ہون دا فریب سب مٹی اچ مل گیا۔ اے دن پنجابی قوم دی آپنی دھرتی لئ قُربانی تے حفاظت دے جذبے نوں قیامت تیکر باقی دُنیا تے واضح کرگیا۔
مہاراجہ پورس پنجاب دا اوہ تاریخی سورما اے جنهے پہلاں ایران دے بادشاہ دارا نوں ہندوستان تے حملہ کرن دا مزہ چکھایا تے فیر سکندر یونانی نوں اوہ تاریخی شکست دتی کی اوہ سکندر جیهڑا پوری دنیا اتے حکومت بناون دی ہوس نال ترکی عراق ایران تے افغانستان نوں تباہ کرن توں بعد پنجاب راہیں ہندوستان اتے حملہ آور ہویا اوہ زخمی کُتے ونگ پوشل سُٹ کے نس گیا۔ الیگزینڈر دی اے جنگ اوهدی زندگی دی آخری جنگ ثابت ہوئی. مہاراجہ پورس نے الیگزینڈر نوں دهول چٹا کے صرف پنجاب ای نهیں بلکہ پورے ہندوستان وچ رہندی دنیا تائیں امر ہو گیا۔
326 قبل از مسیح اچ سکندر ٹیکسلا وچ کجھ چر ارام کرن توں بعد مئی دے مہینے وچ جہلم دریا دے کنڈهے تے اپڑیا. دریا دے پرلے پاسے مہاراجہ پورس دی حکومت سی . سکندر یونانی نے مہاراجہ نوں خط لکھ کہ اطاعت قبول کرن دا کہیا۔ پر پنجابیاں نے سکندر دی اطاعت قبول کرن دے خط دا جواب میدانِ جنگ اچ تلواراں نال دیون دا فیصلہ کیتا۔ مہاراجہ پورس دی فوج وچ پنجاہ ہزار فوجی سن تے دریا دے دوجے پاسے جنگ کرن لئی تیار کهلوتے سن. پورس دی فوج وچ دو سو ہاتهی، تن سو رتھ، چار ہزار سوار تے تیھ (30) ہزار پیادے سن.
پورس نے کوشش کیتی کہ یونانی دریا پار ناں کرن. سکندر نوں پورس دے جنگی ہاتهیاں کولوں خطرہ سیں پر اینهاں ہاتهیاں دے مقابلے وچ آپنے گهڑ سواراں اتےکُج زیادہ ہی بهروسہ سی. یونانیاں لئی جہلم دا چھلدا دریا پار کرنا سوکها نهیں سیں کیونکہ ساون بھادوں دی بارشاں پاروں دریا دا پانی چڑهیا ہویا سیں. دریا پار کرن دا سوکها طریقہ اے ہی س کہ سکندر اکتوبر نومبر تکر اڈیکدا تے جدوں دریا وچ پانی گھٹ ہو جاندا تے فیر دریا پار کردا پر سکندر نے اینا وقت اڈیکن بجائے دریا پار کرن دا سوچیا۔ اس لئی اینهے آبرین (یونانی تاریخ دان) دے لفظاں وچ فیصلہ کیتا کہ اوہ راہ چوری کرے گا. پر ایہ فیصلہ اوهدی زندگی دا سب توں غلط فیصلہ ثابت ہویا تے اونهوں آپنی صرف 33 ورہیاں دی زندگی وی گوانی پئی۔
ہاڑ دے مہینے اچ یونانی فوج دا وڈا پڑاو کهیوڑہ نمک دے پہاڑی سلسلے اچ جہلم دریا دے کنڈهے تے سی. سکندر نے پنجابی فوج نوں دهوکها دین لئی اعلان کیتا کہ اوہ پانی گهٹ ہوون دی اڈیک کرے گا. اینهے فوج نوں آسے پاسے دے علاقیاں وچ لٹ مار کرن دا تے جنگ دا سمان کٹها کرن دا حکم دے دتا. دوجے پاسے یونانیاں دی کشتیاں دا بیڑا دریا دے آسے پاسے پهیرے لا کےاوہ تهاں لبھ ریا سیں کہ دریا پار کر سکے. اینهاں کاروائیاں وچ چهے ست ہفتے لنگھ گے. اینے چر وچ ساون بھادوں دی بارشاں وسن لگ پئیاں تے دریا وچ طغیانی ہور ودھ گئ۔
یونانی بیڑے نے لبهن توں بعد دریا پار کرن دی تهاں فوج دے پڑاو توں سولاں میل اگے چنی. سکندر نے فورا اس منصوبے اتے عمل شروع کر دتا. آرین دے لفظاں وچ اینهے بے انتہا احتیاط دے نال دلیری ورتی. اینهے پنج ہزار سپاہی کیمپ دی راکهی لئی چهڈ دتے تے یاراں باراں ہزار فوجی جدهے وچ پیادے تے سوار دوہیں سن، لے کے ٹر پیا.سکندر دے ٹردیاں ای طوفان آیا تے مینہ وسن لگ پیا. دریا پار کردیاں ہویاں اینهوں ڈاڈهیاں مشکلاں پیش آیاں. اوهدے بوہتے سپاهی تے تے جنگی سمان پانی روهڑ کے لے گیا. سکندر مساں ادهی فوج نال دریا پار کر کے آیا. پورس نوں پتہ لگا تے اوہ آپ مقابلے لئی آیا. پنجابی لشکر وچ تیھ (30) ہزار پیادے دو ہزار سوار تے اک 120 ہاتهی رتھ سن. پنجاب (موجودہ پاکستانی پنجاب ) دے علاقے مونگ دے مقام اتے جنگ دا مدان سجیا.
پورس نے جنگی حکمت عملی دے تحت/ہیٹھ چنگی تهاں تے آپنی پوزیشن سمهالی. سکندر وی فوج دے نال مدان وچ آیا پر ایهدی فوج نوں ناہموار تهاں ملی. پنجابی لشکر ایس دلیری نال لڑیا کہ اے جنگ اک دن توں وی گھٹ جاری رہی۔ پنجابی لشکر اچ موجود ہاتھیاں نے یونانی لشکر نوں تہس نہس کردتا۔ تےکئ سو یونانی جنہاں نوں ہاتھیاں نال جنگ دا کوئ سابقہ تجربہ نہیں سی اوہ ہاتھیاں دے پیراں ہیٹھ دلن گئے۔
مہاراجہ پورس ساڑھے چھ فُٹ دا کڑیل مرد سی اوہ مظبوط اعصاب نال جنگی حکمت عملی اچ وی ماہر ثابت ہویا۔ تے مہاراجہ دی بہادری پورے ہندوستان اچ مشہور ہو گئ۔
جنگ دے دوران اک پنجابی جنگجو کیشر وریاہ نے سکندر نوں برچھا ماردتا۔ سکندر دے زخمی ہوون نالوں یونانی فوج دی رہی سہی ہمت وی ٹُٹ گئ تے اونہاں پنجابیاں نال جنگ بندی دی بینتی کر دتی۔
یونانی تاریخ داناں نے کجھ تهاواں تے سکندر نوں جتو/فاتح لکهیا اے تے آکهیا اے کہ پورس نے گرفتار ہو کے الیگزینڈر نوں آکهیا "میرے نال اوہی سلوک کیتا جاوے جیهڑا اک بادشاہ دوجے بادشاہ نال کردا اے". پر جدوں اسیں تاریخ پڑهئے تے پتہ چلدا اے کہ اول تاں سکندر بادشاہ نے ایران ترکی تے افغانستان دے بادشاہواں نوں قتل کر دتا تے رعایا نوں غلام بنا لیا. تے اے سلوک الیگزینڈر نے ای نهیں بلکہ ہر فاتح بادشاہ مفتوح بادشاہ نال کردا آیا اے سوائے فتح مکہ دے. جتهے رسول اللہ ص نے مکہ آلیاں نوں معاف کر دتا تے اونهاں دے مال نوں ہتھ وی نهیں لایا. پر الیگزینڈر تاں ظالم تے ملکاں تے قبضہ کرن دی ہوس وچ رجهیا سیں. فیر اے تاں ناممکن اے کہ الئگزینڈر نے پورس نوں چهڈ دتا ہوئے . دوجی گل مہاراجہ پورس چالی سال تکر زندہ وی ریا تے پنجاب دا حاکم وی ریا. تے اوهدے بعد اوهدی نسل وی حاکم رئی تے سلطنت دیاں سرحداں وچ وادهاہ وی ہوندا ریا پر الیگزینڈر دی زندگی دی آخری جنگ سیں تےایس تو کجھ دناں بعد اوہ یونان پہنچن توں پہلاں ہی مر گیا تے یونانی سلطنت وکهو وک ہو گئی تے جیهڑے ایران افغانستان سمیت جیهڑے علاقے فتح کیتے سیں اوہ مرکزی حکومت دے ہتهوں نکل گئے
الیگزینڈر یونانی نال جنگ کردیاں ہویاں مہاراجہ پورس دا وڈا پتر راجہ امر دھرتی تے قُربان ہو گیا. شہزادے دی موت اتے کجھ درباریاں نے مہاراجہ پورس نال افسوس کیتا تے مہاراجہ پورس نے تاریخی جملہ بولیا تے آکهیا پنجاب دی حفاظت لئی لڑن آلا ہر سپاهی میرا پتر اے.
تاریخ دان لکهدے نے کہ یونانی فوج دی ہار توں بعد لہندا دکهن/ جنوب مغرب ولے یونانی فوج دے قبضے وچ موجود 33 شہر پورس دی سلطنت وچ شامل ہو گے
کجھ یونانی تاریخ داناں نے تاریخ وچ وادها گهاٹا کر کے یونانی فوج تے سکندر نوں صرف تین ملک تُرکی ایران تے افغانستان فتح کرن تے ہی "سکندر اعظم" (الیگزینڈر دی گریٹ) بناون دی ناکام کوشش کردے نے. پر اے حقیقت چٹے دن وانگ واضح وے کہ سکندر اس جنگ توں کتھے ناں نظر آیا تے ناں ای پنجاب فتح کر سکیا۔
شکریہ
Ammar Ahmed Bashir
Haris Khan
Raees Abbas
کوئی تبصرے نہیں:
ایک تبصرہ شائع کریں