ساڈّی پنجابی تہذِیب کِتنی پرانی اے؟
ساڈّی تہذِیب توں پہلاں دُنِیا وِچ کِتھّے وی تہذِیب دا نِشاں نہیں سی۔ پنجاب دُنِیا نُوں، نسلِ اِنسانی نُوں، تہذِیب سِکھان آلی سب توں پہلی دھرتی اے۔ تے ایہدی تہذِیب، عِلم، ثقافت تے فَن، آپنے وقت دے دُنِیا دے سب توں ودھِیا سَن۔
ہڑپہ دی تہذیب وِچ عِلم تے فَن آپنے عرُوج تے سَن۔ دُنِیا دِیاں پہلی تِن تہذِیباں، دریائے نِیل دی مصر دی تہذِیب، دجلہ تے فرات دی بابل و نینوا دی تہذِیب تے دریائے سِندھو دی ہڑپہ دی تہذِیب، اگّے پِچھّے ای جمِّیاں سَن۔ اگّے پِچھّے ہون دی گَل کَرنے آں تے اسی دو تِن صدِیاں دی گَل کر رہے آں۔ اسی دو تِن سو ورھے پہلاں تہذِیت یافتہ ہو گئے ساں۔ ایہہ کوئی نِکّی گَل نہیں۔ اَج دی دُنِیا دے دو سو توں ریادہ مُلکاں وِچّوں صِرَؾ تِن دیس سَن جیہناں تہذِیب شُروع کِیتی تے ایہناں تِن دیساں وِچّوں اِک ساڈّا دیس پنجاب سی۔ ایہہ پنجاب دی دھرتی دا کمال اے، جیہڑا اسی بھُلّے بیٹھے آں۔ دنیا دی سب تو پہلی یونیورسٹی وی پنجاب دے شہر ٹیکسلا وچ قائم ہوئی، جس وچ دنیا دے نام ور لوک زیر تعلیم رہے
ایس گَل تے سانوں فخر وی ہونا چاہیدا اے تے شرم وی آنی چاہیدی اے۔ فخر
ایس لئی کہ اَسی اوس عظیم دھرتی دے سپُوت آں جِیہنے دُنِیا وِچ سب توں پہلاں تہذِیب جنّی تے ترقی کِیتی۔ تے شرم ایس لئی کہ کِنّاں پُرکھاں دے ہو کے اَسی اَج کِنّے جاہل تے پسماندہ بنے ہوئے آں۔
ساڈّھے چار ہزار ورھے پہلاں ہڑپہ دے نال نال بابُل تے مِصر دِیاں تہذِیباں وی آپنے آپنے عرُوج تے سَن۔ پر ہڑپہ دی تہذِیب اینّی وڈّی سی کہ ایہہ دوویں رَل کے وی ایستوں نِکِیاں سَن۔ ہڑپہ تہذِیب دے گھٹّو گھٹ ستّر شہر سَن جیہڑے پنج لکّھ مربع مِیل دے علاقے تے پھیلے ہوئے سَن۔ ہڑپہ تے موہِنجوڈارو ساڈّھے چار ہزار ورھے پہلاں دے نِیویارک تے پیرَس سَن۔ چالھی چالھی ہزار ابادی دے ایہہ شہر دُنِیا دے سَب توں وڈّے تے نفِیس شہر سَن۔ ایسراں نہیں سی کہ ہزاراں لوکی اِک جگہ تے اکّٹھے ہو گئے تے جیہدا جِتھّے جی کِیتا اوہنے اوتھے ای جھونپڑِی پا لئی۔ ایہہ شہر اِک نقشے دے تحت بنے سَن۔ چَوڑِیاں سڑکاں۔ سِدھِیّاں سڑکاں۔ کمرشَل علاقہ، رہائشی علاقہ، قبرِستان، گودام، ہر شے آپنی مقررہ جگہ تے، اِک مُرَتَب کردا پلین دے مُطابِق بنائی گئی سی۔ گھراں وِچ کھُوہ ہوندے سَن تے ہر گھر توں نالِیاں گندا پانی باہر کڈّھدِیاں سَن۔ ایہہ نالِیاں جدوں گھروں باہر جاندِیاں تے ڈھکّیاں ہوندِیاں۔
ایس پنج لکھّ مربع مِیل دے علاقے وِچ تعمِیر لئی اِٹّ اِکّو پروپورشن دی ورتی گئی سی۔ ہڑپہ نے آپنی زبان وی ایجاد کِیتی سی جیہڑی دُنِیا دی ہر نویں پرانی زبان توں وکھری سی۔ وپاری مال دی پہچان لئی خاص شکل دِیاں مُہراں ورتِیاں جاندِیاں سَن، تے ہر شکل دی مُہر اوہدے مالِک دا خاص نِشان سی۔ یعنی اَج دے زمانے دا ٹریڈ مارک دا نِظام۔ ساڈّے پُرکھ اوس ویلے وی آپنے مُردے دفن کردے سَن۔
جیوۓ پنجاب، وسۓ پاکستان 🇵🇰
عظیم پنجابی قوم دا غیرتمند تے شیر دل پتر
مخدوم ٹیپو سلمان - مصنف (Samha Dvar-Book (Tareekh-e-Punjab
Following is the link to download full book.
https://www.researchgate.net/publication/334257767_Samha_Dvar-Punjabi_Book
کوئی تبصرے نہیں:
ایک تبصرہ شائع کریں